Knattspyrnufélagið Þróttur hefur sent borgarráði Reykjavíkurborgar formlegt erindi þar sem félagið krefst þess að borgin efni samningsbundnar skyldur sínar um úthlutun æfingatíma í Laugardalshöll.
Samkvæmt samningi frá 12. desember 1996 eru Þrótti tryggðir að lágmarki 40 æfingatímar á viku í Laugardalshöll á tímabilinu september til apríl. Raunstaðan í dag er hins vegar sú að félagið hefur einungis um 12,5 klukkustundir til umráða í höllinni, sem er verulegt og langvarandi frávik frá samningsbundnum réttindum.
Í erindinu kemur fram að Þróttur telji að um sé að ræða skýra vanefnd af hálfu Reykjavíkurborgar sem hafi haft veruleg áhrif á starfsemi félagsins, sérstaklega hvað varðar aðstöðu fyrir inniíþróttir og þjónustu við iðkendur.
Þróttur bendir á að samningurinn sé skýr og bindandi fyrir báða aðila og að samkvæmt áliti borgarlögmanns frá nóvember 2025 sé óheimilt að breyta honum einhliða eða rýra aðstöðu félagsins án samþykkis beggja aðila.
Þrátt fyrir ítrekaðar tilraunir til að ná fram úrbótum í samtali við borgina hefur málið enn ekki fengið farsæla niðurstöðu. Félagið óskar því eftir að borgarráð taki málið til umfjöllunar og vinni að því að tryggja að samningsskyldur verði efndar. Jafnframt hefur verið óskað eftir fundi með samráðshópi samkvæmt samningnum og áskilur félagið sér rétt til að fylgja málinu eftir með viðeigandi hætti.
Vegna ítrekaðra fyrirspurna frá félagsmönnum og íbúum Laugardals hefur stjórn Þróttar ákveðið að birta erindið opinberlega.
Erindið í heild sinni fer hér að neðan:
Reykjavík 9. apríl 2026.
Samningsbundinn réttur Þróttar til æfingatíma í Laugardalshöll
Með samningi Reykjavíkurborgar og Þróttar frá 12. desember 1996 skuldbatt Reykjavíkurborg sig til að láta Þrótti í té aðstöðu í Laugardal sem á að fullnægja starfsemi félagsins til frambúðar og gera ráð fyrir aukningu hennar og eðlilegum breytingum eins og sagði í 2. gr. samningsins.
Meðal þeirrar aðstöðu sem Reykjavíkurborg skuldbindur sig til að láta Þrótti í té eru æfingatímar í Laugardalshöll. Samkvæmt ákvæði 3. gr. a í samningnum, eru Knattspyrnufélaginu Þrótti tryggðir að lágmarki 40 æfingatímar á viku í Laugardalshöllinni. Þessir tímar skulu ákveðnir fyrirfram á hverju hausti í samráði við Íþrótta- og tómstundaráð Reykjavíkur (ÍTR) og Íþróttabandalag Reykjavíkur (ÍBR), en þá skulu einnig liggja fyrir upplýsingar um samninga um mót, keppnir og útleigu á Höllinni frá 1. september til aprílloka. Komi til þess að tímar Þróttar séu felldir niður vegna ófyrirséðra afnota Höllarinnar, og ef ekki fást sambærilegir tímar í nágrenni Laugardals, á félagið rétt á bótum sem nema tímagjaldi sem þá gildir um afnot íþróttafélaga.
Skuldbindingar gildi samnings frá 1996.
Knattspyrnufélagið Þróttur hefur ítrekað mætt skilnings- eða skeytingarleysi af hálfu borgarinnar þegar kemur að efndum samnings aðila frá 1996. Hafa fulltrúar borgarinnar annað hvort ekki verið meðvitaðir um efni samnings eða ákveðið að hunsa ákvæði hans, nú síðast vegna undirbúnings byggingar unglingaskóla í Laugardal.
Þróttur telur sérstaka ástæðu til að minna Reykjavíkurborg á afstöðu borgarlögmanns í minnisblaði dags. 21. nóvember 2025, vegna lagalegrar stöðu Þríhyrnings. Í því minnisblaði er fjallað um skuldbindingargildi samnings aðila og er það afstaða borgarlögmanns að samningurinn er skýr um réttindi Þróttar. Samningnum verður ekki sagt upp einhliða og óheimilt er að rýra aðstöðu félagsins einhliða. Breytingar á samningnum eru einungis mögulegar ef þær eru óhjákvæmilegar vegna breyttra aðstæðna í framtíðinni og þá að mati beggja aðila samningsins, sbr. 6. gr. samningsins. Samningnum verður ekki breytt einhliða af öðrum hvorum samningsaðila.
Krafa um efndir
Í ljósi framangreinds á félagið rétt til 40 æfingatíma í Laugardalshöll og Reykjavíkurborg ber að tryggja úthlutun þeirra tíma. Mörg undanfarin ár hefur Þróttur ekki fengið úthlutað æfingatímum í Laugardalshöll og Reykjavíkurborg ekki leitast við að tryggja félaginu samningsbundna úthlutun. Félagið hefur verið á hrakhólum með æfingaaðstöðu fyrir inniíþróttir vegna vanefnda Reykjavíkurborgar.
Það er grundvallarregla samningaréttar að gildur samningur er bindandi fyrir aðila, og gildir það jafnt um sveitarfélög sem aðra samningsaðila. Sveitarfélögum ber að standa við einkaréttarlega samninga sem þau gera. Þótt sveitarfélög séu bundin af meginreglum stjórnsýsluréttar við töku ákvarðana, svo sem jafnræðisreglu og kröfu um málefnaleg sjónarmið, veitir það þeim ekki heimild til að víkja einhliða frá samningsbundnum skuldbindingum. Samningsgerð sveitarfélaga verður að byggjast á heimild í lögum og samræmast sveitarstjórnarlögum nr. 138/2011, en þegar gildur samningur hefur verið gerður ber sveitarfélagi að efna hann. Dóma- og álitaframkvæmd hefur ítrekað staðfest að sveitarfélög geta bakað sér skaðabótaábyrgð með því að rjúfa eða vanefna einkaréttarlega samninga.
Krafa Þróttar
Með vísan til samnings Knattspyrnufélagsins Þróttar og Reykjavíkurborgar frá árinu 1996, og þeirrar afstöðu borgarlögmanns að um sé að ræða afdráttarlausan og ótímabundinn samning sem ekki verður sagt upp einhliða, krefst félagið hér með að Reykjavíkurborg efni skuldbindingar sínar samkvæmt 3. gr. a samningsins og úthluti Knattspyrnufélaginu Þrótti æfingatímum í Laugardalshöll í fullu samræmi við ákvæði hans. Félagið áskilur sér allan rétt til bótakröfu á hendur borginni vegna viðvarandi vanefnda á samkomulaginu. Félagið harmar framkomu borgarinnar og skort á samtali og samráði. Félagið óskar eftir tafarlausum fundi með samráðshópi skv. 6. gr. samnings aðila og jafnframt að Reykjavíkur vinni með félaginu og efni samningsskyldur sínar.
F.h. Knattspyrnufélagsins Þróttar
Bjarnólfur Lárusson, formaður
